«IQANAT» республикалық олимпиадалық байқауының ІІ аудандық кезеңі өтті.
Ауданымызда «IQANAT» республикалық олимпиадалық байқауының аудандық іріктеу кезеңі басталды. Бүгін ауданымыздың оқушылары бақ сынады. Республикалық кезеңге дейін жетіп, жеңімпаз атанғандар шетелдің және еліміздің үздік ЖОО-ның білім гранттарын иеленетін болады.
Озаттардың ішінен ең мықтысын таңдайтын білім додасы жеңімпаздары тегін оқуға жолдама алады.
Олимпиаданың аудандық іріктеуі кезеңі Талас ауданы Қаратау қаласындағы "Ахмет Байтұрсынұлы атындағы гимназия" КММ өтті. Аталған байқауда оқ бойы озық шыққандары еліміздің және шетелдің жоғарғы оқу орындарының гранттарына ие болады.
Олимпиаданың негізгі мақсаттары мен міндеттері:
- қабілетті оқушыларды анықтау және қолдау, ауыл оқушыларының шығармашылық,танымдық, зияткерлік бастамаларын жандандыру;
- оқушылардың математика, физика, ағылшын тілі және әдебиет сияқты пәндерді оқуға қызығушылығын қалыптастыру;
- оқушылар арасында тікелей байланыс пен тәжірибе алмасуға жағдай жасау.
Олимпиада әр жарты жыл сайын келесі пәндер бойынша өткізіледі:
• Математика
• Физика
• Ағылшын тілі
• «Эрудит» эссе конкурсы
Осы байқау аясында «АЙЛС» тестілеуіне де дайындықтар жүргізіледі. Мектеп оқушылары үшін құлаққағыс, келесі жылға өтінімдер қабылдау “Айқанат.кз” сайтында жүзеге асырылады.
